Buki di Pret 2026: Muchanan a bishita instalacionnan di 24ora.com

Pa prome biaha, dialuna mainta nos ekipo di 24ora.com a ricibi cinco mucha di Buki di Pret cu a inscribi nan mes pa asina conoce e instalacionnan di Headlines Group y kico e trabou aki ta encera. Quishon Jones, Leah Hernández, Vira Richardson, Ruben Vogelaar, Zenny Henriquez tabata e cinco balente participante cu a pasa mita dia na 24ora.com unda cu nan a haya un presentacion di introduccion di kico tur e trabou ta encera pa despues sigui pa un office tour rond di e instalacionnan. Muchanan a conoce e departamento di produccion y tambe redaccion. Cada empleado di Headlines Group a haya oportunidad di presenta nan mes y kico nan rol ta na 24ora.com. E muchanan tambe a haya oportunidad di graba un tiktok cu algun di nos coleganan y a siña un tiki di con pa edit video. Despues a sigui pa conoce e studio di Enfoke unda cu tambe a haci un live mention durante e programa. Muchanan a haya e chens di reporta un news story nan mes cual a bira un bunita video. Na final e muchanan a expresa di ta hopi contento cu e bishita na 24ora.com y a expresa cu sigur nan lo bin e proximo aña durante nan vakantie atrobe. The post Buki di Pret 2026: Muchanan a bishita instalacionnan di 24ora.com appeared first on 24ora - Prome Den Noticia.