SV Britannia cla pa representa Aruba den CFU Shield Cup 2026 na Trinidad

Durante un conferencia di prensa, SV Britannia a presenta e detayenan di nan proximo biahe pa Trinidad pa representa Aruba den e CFU Shield Cup 2026. Despues di a sali campeon local, e club a enfrenta algun reto financiero pa cubri e gastonan di e campeonato internacional aki. Sinembargo, e directiva a traha intensamente den 4 pa 5 dia pa haci e biahe aki un realidad. Danki n’e esfuerso conhunto y e sosten financiero y moral di Lotto pa Deporte, Arubaanse Voetbal Bond (AVB) y Minister di Deporte, mr. Gerlien Croes, e ekipo a logra e fondonan necesario. E prome grupo di e delegacion ta sali diamars y e di dos grupo dia 22 di juli pa Trinidad, mientras nan prome compromiso oficial lo tuma luga dia 25 di juli pa 4:00 pm. Directiva a gradici e hungadonan y nan famianan p’e gran sacrifisio, nificando cu tin tres aña cu e futbolistanan no sa kico ta vakantie pa motibo di e preparacion continuo. Facebook live link: https://www.facebook.com/share/v/1D4dxog7up/ Minister Gerlien Croes a resalta e compromiso di Gobierno di apoya talentonan local y a revela cu tin negociacion andando pa introduci un scol pa deportistanan cu estudio online y entrenamiento di dia. Di nan parti, AVB y Lotto pa Deporte a felicita e ekipo campeon di e temporada 2024/2025. Ambos entidad a reitera nan compromiso di sigura e bon uzo di e fondonan y di duna oportunidad n’e talento Arubano pa destaca y representa e pais dignamente riba un plataforma internacional. Pa mas detaye lesa TREMPAN. The post SV Britannia cla pa representa Aruba den CFU Shield Cup 2026 na Trinidad appeared first on 24ora - Prome Den Noticia.