Boluntario di Cruz Cora Aruba a comparti nan experiencia durante e mision Gobierno di Aruba a duna reconocemento na team boluntario cu a brinda asistencia humanitario na Venezuela

Durante e bishita di secretario di estado Eric van der Burg na Aruba, Prome Minister mr. Mike Eman hunto cu Van der Burg y secretario general di Ministerio Asunto General Robert Candelaria a reuni na CMO cu e boluntarionan y e profesionalnan cu a contribui na e mision humanitario na Venezuela despues di e temblor. Durante e encuentro, ambos autoridad a expresa nan gratitud y profundo aprecio pa tur esnan cu a forma parti di e operacion, tanto na Venezuela como for di Aruba. Atencion special a bay pa e miembronan di Cruz Cora Aruba, CMO, Marina Real, Ministerio di Defensa, Departamento di Relacionnan Exterior y tur otro persona y organisacion cu a contribui na e mision. Aprecio na nomber di Gobierno Hulandes Secretario di estado Van der Burg a indica cu tabata importante pa reuni personalmente cu e team y expresa cuanto Gobierno Hulandes ta aprecia e trabou cu nan a realisa. El a destaca cu ora un emergencia presenta, Cruz Cora, CMO, Defensa y diferente otro organisacion ta para cla pa actua. Segun Van der Burg, e mision tabata exigente, no solamente den sentido logistico y fisico, sino tambe emocionalmente. E team a confronta hopi sufrimento y situacion den cual no tur victima por a haya e sosten cu nan tabatin mester. A pesar di esaki, e boluntarionan y e profesionalnan a mustra curashi, dedicacion y humanidad. Van der Burg a recorda cu inmediatamente despues di e temblor el a tene contacto cu e lidernan di Aruba, Corsou y Boneiro. El a subraya cu e reaccion rapido ta mustra importancia di cooperacion y solidaridad dentro di Reino Hulandes. “Cu esaki nos ta mustra con importante humanidad y solidaridad ta. Tin momento cu nos por tin diferencia di opinion, pero ora realidad exigi accion, nos ta para hunto,” Van der Burg a expresa. Laso historico entre Aruba y Venezuela Prome Minister Mike Eman a destaca e relacion special cu ta existi entre Aruba y Venezuela. Aruba tin un comunidad Venezolano grandi y e lasonan historico, cultural y familiar entre ambos pais ta bay pa varios siglo. Segun Prome Minister Eman, Aruba a biba e tragedia no solamente como un isla solidario cu un pais den necesidad, sino tambe como un comunidad cu ta sinti un conexion profundo cu pueblo Venezolano. Poco despues di e temblor, Gobierno di Aruba a reuni cu CMO y e organisacionnan di husticia y siguridad nacional pa evalua e situacion y determina con Aruba por a yuda. For di e momento ey, preparacion y coordinacion di e mision a cuminsa. Prome Minister Eman a duna reconocemento na Cruz Cora Aruba y CMO pa nan reaccion rapido. El a gradici Ministerio di Defensa pa e sosten brinda pa e team Arubano por a yega Venezuela na tempo y den forma sigur via un avion di wardacosta. Relacionnan Exterior y Embahada di Reino Hulandes na Venezuela tambe a mantene contacto estrecho cu e team. Representantenan di e embahada a bishita e grupo pa verifica cu nan tabata bon instala y den un lugar sigur. E sosten aki tabata particularmente importante mirando e preocupacionnan cu tabatin tocante seguridad den e pais. “Nos kier a yuda, pero na mes momento nos tabata kier pa nos hendenan keda sigur. E mision aki ta mustra unda e balor agrega cu Reino ta sinti,” Prome Minister Eman a expresa. Experencia di e boluntarionan Arubiano na Venezuela Marylaine Lopez di Cruz Cora Aruba a conta cu e mision a consisti di dia largo, hopi ora di trabou y condicion dificil bou di e calor intenso di La Guaira. E team Arubano a traha hunto cu Cruz Cora Venezolano, diferente colaborado humanitario y e unidad Urban Search and Rescue (USAR-NL) di Hulanda. Ora e team a yega den e area afecta, practicamente nada tabata prepara. Nan mester a yuda na tur caminda y den tur forma cu tabata necesario. Durante e mision nan a traha den campamento, den hospital y, durante e ultimo dianan, riba caya den e areanan afecta. Aya nan por a mira e destruccion di cerca y sinti e miedo y dolor di e habitantenan. “Diesdos dia ta parce hopi, pero no tabata suficiente. Mayoria di nos kier a haci mas. Nos a haci loke nos por a haci, nos a traha duro y nos ta hopi orguyoso di e trabou cu nos a realisa,” Lopez a conta. E mision a brinda experencia nobo na diferente miembro di e team. Alabes, Lopez a expresa e speransa cu Aruba nunca lo mester pasa door di un tragedia similar. E magnitud di e destruccion ta grandi y recuperacion di e areanan afecta lo tuma hopi tempo. Marla Thiel di Cruz Cora Aruba, kende anteriormente a participa cinco biaha den mision humanitario na Haiti y otro paisnan, a comparti cu e experiencia na Venezuela tabata diferente, pero emocionalmente hopi impactante. Un di e momentonan mas pisa tabata ora e team a bishita e areanan afecta y por a papia directamente cu e habitantenan. Thiel a conta di un homber cu a perde su casa, su tres yiunan y su mama durante e desaster. A pesar di su perdida inmenso, e homber a dicidi di keda na e sitio pa yuda otro famia busca nan sernan stima. E testimonio a mustra e dolor profundo cu hopi sobreviviente a carga, pero tambe nan fortalesa y solidaridad cu otro. Thiel a indica cu e consecuencianan psicologico di e desastre ta preocupante. Personal di Cruz Cora Venezolano a informa cu nan tabata atende persona den crisis emocional serio, despues cu nan a perde famia, cas y nan medionan di existencia. “Bo mester keda fuerte y sigui yuda unda cu bo por. E situacion ta grave y recuperacion lo dura hopi tempo,” Thiel a expresa. Lopez y Thiel tambe tabata presente durante un periodo final di 14 ora di e operacion pa rescata Hernán Gil Flores. Nan a brinda sosten cerca di e ambulance y a asisti cu transporte di un pashent pa hospital. Reconocemento pa esfuerso  Tanto Prome Minister Eman como secretario di estado Van der Burg a enfatisa cu e mision tabata posibel danki na cooperacion entre diferente organisacion y e entrega di tur persona envolvi. E reconocemento no tabata solamente pa e team cu a biaha pa Venezuela, sino tambe pa esnan cu a keda na Aruba pa coordina transporte, material, comunicacion, siguridad y otro aspecto logistico. Prome Minister Eman a duna un danki special na CMO, bou di coordinacion di Rino Hermans, Cruz Cora Aruba, Ministerio di Defensa, Relacionnan Exterior, Embahada di Reino Hulandes y tur otro instancia cu a contribui na e mision. Van der Burg a destaca cu e esfuerso ta mustra cu solidaridad dentro di Reino ta funciona den tur direccion. Mescos cu e paisnan ta prepara pa yuda Sint Maarten, Saba y Sint Eustatius durante temporada di horcan, Aruba y e otro paisnan dentro di Reino tambe por conta riba cooperacion ora un emergencia presenta den nos region. E encuentro na CMO a finalisa cu palabra di gratitud y reconocemento pa e curashi, dedicacion y humanidad di tur e boluntarionan y e profesionalnan cu a contribui na e mision humanitario. The post Boluntario di Cruz Cora Aruba a comparti nan experiencia durante e mision Gobierno di Aruba a duna reconocemento na team boluntario cu a brinda asistencia humanitario na Venezuela appeared first on Aruba Native.