E trahadonan di Bestuurskantoor tambe ta solidario cu Venezuela
Despues di e temblor fuerte cu a afecta Venezuela, Aruba a uni forsa pa brinda ayudo humanitario. Gobierno di Aruba, Cruz Cora Aruba, Crisis Management Office (CMO), e companianan, e organisacionnan y comunidad a mobilisa pa yuda e pueblo Venezolano.
Mientras cu e Disaster Response Team (DRT) di Cruz Cora Aruba hunto cu CMO a brinda asistencia medico na Venezuela, Aruba a mustra di ta solidario y haci colecta di varios articulo di prome necesidad, manera cuminda den bleki, producto pa baby, articulo di higiene personal, cuminda pa cacho, kit di EHBO y otro articulo esencial.
E trahadonan di Bestuurskantoor riba nan mesun iniciativa tambe a responde n’e yamada di solidaridad. Pa algun siman a haci colecta cerca cada ministerio.
Danki na e generosidad di e personal, a logra colecta un cantidad di donacion cu a entrega na representante di Cruz Cora Aruba, kende a pasa pa recoge e articulonan.
Gobierno ta expresa su sincero gratitud na tur trahado di Bestuurskantoor cu nan aporte; e ta un muestra cu, aunke Aruba ta un pais chikito, nos solidaridad ta grandi.
The post E trahadonan di Bestuurskantoor tambe ta solidario cu Venezuela appeared first on 24ora - Prome Den Noticia.
7/18/2026 11:33:23 AM