Ta denuncia atake cu a laga su auto destrui

Akeem Aikman a haci un denuncia publico despues di un altercacion cu, segun e, a termina cu daño material na su auto. El ta expresa su descontento cu e proceso legal y e gasto cu awo e mes mester asumi. Akeem Aikman a relata cu e incidente a tuma luga mientras cu e tabata na un area cerca di 88 Food Mart. Segun su relato, e conflicto a surgi cu un homber conoci como “Sander” cu tur ora ta banda di e supermarket aki, bou un palo. Sander tabata rabia pa motibo cu Aikman tabata saliendo cu un señora cu e tambe tabata interesa den dje. Aikman a conta cu e homber a cuminsa insult’e y, aunke cu el a pidi pa calma e situacion, e altercacion a sigui escala. Segun e denuncia, Sander a tira un boter riba su auto, y a kibra e windshield. Aikman a bisa cu, pa evita cu e conflicto bira mas serio, el a purba bay for di e luga, aunke e persona tambe a logra dal e y el a reacciona. Despues di e incidente, Aikman a presenta un denuncia na Recherche. Sinembargo, e ta lamenta cu e proceso por tuma varios luna prome cu trata e  caso, mientras cu e uzo normal di su auto ta iimposibel n’e momentonan aki.  Segun Aikman, e autoridadnan a informa cu e mes mester paga e costo di cambia e windshield, cual por costa entre AWG 1.400, incluyendo instalacion, y despues e por reclama e gasto n’e responsabel. El ta considera e procedimiento aki inhusto, ya cu, segun su opinion, e victima ta carga cu e gasto mientras e otro involucra ta sigui liber. default The post Ta denuncia atake cu a laga su auto destrui appeared first on 24ora - Prome Den Noticia.