Aruba a uni pa yuda Venezuela

Den un acto di solidaridad sin precedente, un grupo di boluntario na Aruba a uni forsa pa recolecta, organisa y manda ayudo humanitario p’e comunidadnan mas afecta p’e tragedia na Venezuela. Danki n’e apoyo di pueblo di Aruba y e trabou incansabel di decena di boluntario, e iniciativa a bira un exito. Orlando Garcia a conta cu e iniciativa a nace un dia despues di e tragedia, ora “Ale” a propone pa un grupo di amigo uni forsa y haci algo concreto pa yuda Venezuela. Inmediatamente nan a cuminsa prepara e flyernan, contacta cliente, amigonan y e medionan di comunicacion pa mobilisa apoyo. E prome donacionnan tabata chikito, pero den poco tempo e cantidad di ayudo a sigui crece, loke a haci cu nan a crea un gran cadena di boluntario. Na Caribbean Print Center a cuminsa e colecta, pero ora e cantidad di e donacionnan a aumenta, Carlos a ofrece un local na Paseo Herencia, unda nan a instala e centro principal di logistica. E mes a encarga di organisa y paketa tur e donacionnan. Alejandro Lovera a describi e campaña como un “exito rotundo”, a pesar di e diferente dificultadnan. El a splica cu e transporte di Coro pa Caracas, cu normalmente ta dura seis ora, a tuma mas di 30 ora debi na diferente punto di control y e situacionnan cu e autoridadnan na Venezuela. Finalmente, e ayudo a yega na Caracas, unda, cu apoyo di e famia Vegas y Fundaprocura, e distribucion a sigui p’e comunidadnan manera Higuerote, La Guaira y otro pueblonan cu tabata gravemente afecta. Akinan, hopi di e famianan humilde a habri nan cas pa acoge e personanan cu a keda sin hogar, mientras e donacionnan di paña, cuminda y awa, a yuda atende e necesidadnan mas urgente. Mas aleu, Carlos Sanabria a conta cu, ora el a tende di e tragedia, su prome deseo tabata bay personalmente como boluntario. Sinembargo, despues di busca diferente opcion, el a compronde cu por medio di e centro di logistica na Paseo Herencia por a aporta mas n’e causa, coordinando e preparacion di tur e carga. Por ultimo, Tina Faria a expresa su gradicimento na henter pueblo di Aruba y na tur nacionalidadnan cu a aporta n’e campaña. Segun e, e nivel di colaboracion a supera tur expectativa, yegando na un momento cu mas di 30 boluntario tabata trahando hunto pa clasifica, paketa y prepara e donacionnan pa nan destino final na Venezuela. The post Aruba a uni pa yuda Venezuela appeared first on 24ora - Prome Den Noticia.