Cuido a avansa pero … falta: Te ainda tin tardansa pa haya cita den cierto specialisacion

Servicio di cuido aki na Aruba, a conoce un desaroyo impresionante sin duda, caminda no solamente e sector aki a crece bira masha grandi mes y tambe mas specialisa pero henter e sector aki ta dunando un miho servicio en general pero asina mes, no tur aspecto pa un bon cuido pa comunidad, ta na nan luga y esey sin duda   por tin su consecuencianan serio. Tin varios situacion  di preocupacion. Por duna e ehempel, den caso di cuido di fisioterapia, no ta conoci si tin un escasez of e sistema cu tin no ta funcionando. Actualmente tin 32 profesional di e ramo aki trahando bou contracto cu AZV. Pero pa algun tempo caba e pashent tin cu spera minimo 4 siman pa haya cita mientras cu diferente fisioterapista no ta tuma pashent nobo pa e  simpel motibo cu no por atende mas hende. Pa atende nan pashentnan y incluso bishita pashent te na cas, ta causa cu diferente fisioterapista mester traha te atardi laat y algun hasta ora cu ya anochi a yega. Na e momentonan aki, Aruba ta conta cu 32 fisioterapista y un cita cu un di e profesionalnan aki ta algo cu no ta tuma 15 minuut mescos cu esun di e pashent cu ta bay busca ayudo na dokter di cas. Cada pashent ta tuma sigur mey ora.  E situacion aki ta asina delicado, pasobra tin hopi pashent cu ta rekeri atencion rapidamente pa nan recuperacion, y tin cu  warda hopi tempo pa haya un cita y ora cu esaki sosode, nan tratamento ta asina limita of ta ser brinda poco atencion, mirando e cantidad di pashent cu algun di e centronan aki ta trata. Pues no por tira e culpa riba e fisioterapista.  Tin pashentnan cu sea pa cancer cu a mira nan bida cambia di un dia pa otro,  no ta haya e cantidad di atencion cu nan ta rekeri pa recupera fisicamente for di e malesa cu nan a wordo confronta cu’ne y esaki ta pone cu e falta di intensidad pa haya nan tratamento, ta pone cu nan recuperacion fisico ta conoce un  contratiempo cu ta pone cu nan lo no por recupera cierto aspectonan fisico cu nan a perde durante tratamento di e cancer. No ta den e sector di fisioterapia so tin e situacion aki, ya cu den otro sectornan specialista, tambe tin problemanan serio ya cu no tin suficiente personal specialisa pa atende tur hende cu acudi cerca nan, den un situacion mas adecuado. Aruba ta conta cu  27 specialismo na e momentonan aki cu 87 specialista pa atende e 108 mil habitantenan legal riba e isla y contando ilegal mas bishitantenan, esaki ta bira hopi mas y esey ta e motibo principal cu ta dificil pa un persona haya un cita na tempo. Den e area akai tambe tin un tempo di espera.  Hopi biaha pa un motibo of otro, despues di haya un cita, un dia prome ta cambien pa te un luna despues. es.  Ta mesun situacion aki tin na dokter di cas ya cu aki  na Aruba na e momentonan aki tin 50 dokter di cas y ningun por tin mas cu 2000 pashent. Esey ta e limpite cu AZV a pone pa nan.  Na momento cu analisa e hecho cu si Aruba tin 108 mil habitante legal, tin ocho mil cu ta manera den limbo, sin conta esunnan cu ta ilegal. Asina por haya un bista di e situacion cu tin aworaki. E limitacion aki ta nifica cu practicamente dokter ta mira un pashent 1 te 2 bes pa aña, y si mester di ayudo medico topch, hopi biaha e atencion ta manera pura pura cu e dokter puntrando e pashent “kico bo kier mi haci pa bo”, manera cu el a fada di scucha e pashent.  A haci un intento pa mehora e situacion cu uzo di POH, profesionalnan cu ta brinda apoyo na dokternan di cas cu pashentnan cu malesa cronico. Nan no ta dokter pero por yuda scucha e kehonan.  Cuido medico aki na Aruba, a dal un stap grandi ora cu a cambia di PPKaart di añanan 70-80-90 pa AZV na aña 2001 pero no ta tur e dolornan di e sector aki a wordo a elimina. Ainda tin hopi keho den cuido y lo ta na su luga pa scucha e pashent, haci manera cu ATA a haci scuchando e pueblo y a cambia e concepto di con e ta promove Aruba. The post Cuido a avansa pero … falta: Te ainda tin tardansa pa haya cita den cierto specialisacion appeared first on 24ora - Prome Den Noticia.