Parlamentario Dangui Oduber: NO tin prijs pa nos libertad!

E Secretario di Estado di Hulanda, Eric van der Burg, ta na Aruba pa​ asina discuti cu Gobierno di Aruba riba e cambionan y adaptacionnan na e ley di reino Hofa.​ Parlamentario Dangui Oduber a señala cu esaki ta tuma luga despues cu tanto Raad van​ Advies como Raad van State a conclui cu e ley aki ta mina e autonomia di Aruba,​ confirmando asina loke e parlamentario a bini ta bisa for di hopi tempo caba. Oduber a enfatisa cu, na e momento cu tanto Hulanda como Aruba ta conclui cu mester trece​ cambio y adapta e Rijkswet Hofa, esaki ta un indicacion cla caba cu e ley NO ta sirbi y sigur​ e no ta sirbi e interesnan di Aruba. E parlamentario a declara cu pa un simpel “sakito di​ placa”, un pais NO ta entrega su libertad y autonomia. El a recorda cu desde aña 1986, Aruba a demostra cu e tin e capacidad pa goberna su mes y​ supera crisis. Den e cuadro aki, el a subraya e importancia pa semper confia den e capacidad​ y profesionalismo di e propio hendenan di Aruba pa dirigi e rumbo di nos isla.“Ta insolito pa​ pensa cu tin politiconan cu kier entrega y bende nos pais pa un sakito di placa di apenas 7.5​ miyon florin. Nos autonomia y libertad NO tin balor di placa; e no tin prijs!” Oduber a​ declara. Pa demostra cu no tin ningun motibo ni hustificacion valido pa acepta e Rijkswet Hofa,​ e parlamentario a presenta datonan concreto riba e realidad financiero di ​nos pais. Aruba tin su propio supervision financiero debidamente regula den e​ Landsverordening Financieel Toezicht (LAft).​ Aruba ta cumpliendo debidamente cu tur e normanan financiero stipula y ta pagando​ su debenan na Hulanda.​ Y danki na un maneho responsabel, den un transcurso di apenas 5 aña, e debe​ nacional di Aruba lo baha pa bou di 50%. Finalmente, e parlamentario a reafirma cu libertad di un pais ta algo sagrado. El a splica cu​ Aruba ta un pais liber desde aña 1986 y danki na e libertad aki e pais por a prospera y​ progresa. El a adverti cu e Rijkswet Hofa lo nifica un retroceso democratico enorme, kitando​ for di Aruba e libertad pa tuma su propio decisionnan, e libertad pa vota den Parlamento y e​ libertad pa uza su fondonan manera e ta desea. The post Parlamentario Dangui Oduber: NO tin prijs pa nos libertad! appeared first on 24ora - Prome Den Noticia.