Drs. Shailiny Tromp-Lee: “Union entre e islanan ta haci forsa: nos ta cla pa e deliberacionnan di Tripartiet”

Fraccion di MEP ta cla y debidamente prepara pa e reunionnan di Tripartiet cu ta inicia mañan na Hulanda, caminda e parlamentarionan di Aruba, Corsou y Sint Maarten lo bini hunto pa atende topiconan di gran importancia pa e futuro y bienestar di nos islanan, prome cu e inicio di e Interparlementair Koninkrijksoverleg (IPKO). Parlamentario Tromp-Lee a duna un relato detaya di e puntonan clave cu lo wordo debati, enfocando riba e necesidad urgente pa yega na un areglo di Disputa (Geschillenregeling) den Reino y riba e evaluacion di e Onderlinge Regeling pa loke ta trata e reformanan structural.   E culminacion di e Geschillenregeling  Un di e topiconan crucial ta e avance di e Geschillenregeling (Arreglo di Disputa), un instrumento legal clave pa resolve disputanan structural den Reino. Despues di a cana su caminda na Rijksministerraad y ricibi e conseho di Raad van State na Maart ultimo, e islanan lo reuni pa defini e cambionan final a base di e proposicionnan presenta door di Corsou. Como pais, nos tin cu ratifica e necesidad urgente pa formalisa e areglo di disputa aki den Reino. “Esaki ta un ley cu nos a traha hopi duro riba dje y mañan lo ta e dia crucial pa determina e cambionan definitivo na e concepto,” Tromp-Lee a declara.   Evaluacion di e Onderlinge Regeling  Un otro punto central riba agenda ta e evaluacion di e Onderlinge Regeling pa loke ta trata e reformanan di e Landspakket. Tromp-Lee a splica cu e rapport di evaluacion ta subraya tres reto principal:   Falta di Capital Humano: E reformanan structural acordá tabata hopi ambicioso riba diferente tereno, pero nos ta carece di e capital humano necesario, specialmente di e huristanan legislativo, cu ta indispensabel pa por traduci e deseonan di e reformanan aki den leynan concreto. Scarsedad di Fondonan: Tin un falta di recursonan financieropa por garantisa un implementacion debido. E Factor Tempo: Un pais chikito manera Aruba no tin e capacidad pa ehecuta varios reforma simultaneamente.   “E Onderlinge Regeling aki ta finalisa otro aña, y como pais nos tin cu tuma decisionnan definitivo riba e conseho central: pa extende e areglo aki cu 2 aña mas, selectando unicamente e reformanan di prioridad halto pa asina percura cu nos por finalisa nan exitosamente. Nos tin cu siña for di e evaluacion aki y saca puntonan di atencion crucial pa futuro areglonan cu nos lo cera cu Hulanda,” e parlamentario a declara.   Memoria di Sclavitud y Union Monetario Fuera di e asuntonan financiero, e delegacionnan lo atende temanan historico y economico importante. Un di e puntonan central, lidera pa Sint Maarten, ta e pasado di sclavitud (Slavernijverleden). E discusion lo enfoca riba e dispensacionnan y declaracionnan cu a tuma lugar formalmente di parti di Hulanda, y con e tres islanan den un front unifica por exigi un miho contesta, cumplimento y reparacion di e fondonan priminti. Ademas, nos lo scucha e retonan actual di e Union Monetario entre Corsou y Sint Maarten.   Union ta haci forsa   E delegacionnan lo delibera tambe riba un iniciativa pa formaliza e structura di trabou entre Aruba, Corsou y Sint Maarten, cu e meta pa uni forsa y defende interesnan mutuo. Den e cuadro aki, lo atende e retonan di idioma pa facilita e deliberacionnan. Un propuesta innovativo di parti di e delegacion di Aruba ta pa permiti e uzo oficial di lenga materno durante e asambleanan entre e islanan, Tromp-Lee a indica. E planteamento aki, presenta door di Hendrik Tevreden, ta pa cada pais expresa su mes den su propio idioma, kibrando cu e formalismo di uza unicamente Hulandes pa asina expresa ideanan cu mas claridad y confiansa. Tromp-Lee a finalisa enfatisando cu un union solido entre e islanan ta e unico clave pa logra cambionan real y un miho futuro den Reino. The post Drs. Shailiny Tromp-Lee: “Union entre e islanan ta haci forsa: nos ta cla pa e deliberacionnan di Tripartiet” appeared first on Aruba Native.