PPA TA BAY HULANDA CU ENFOKE RIBA TRIPARTIET, IPKO Y FUTURO DI REINO

  Geschillenregeling, Un bario/distrito cono ecosistema cu enfoke riba ‘ouderzorg’ y herencia di esclavitud ta entre e tema principalnan cu lo trata   Fraccion di PPA ta actualmente na Hulanda pa participa den diferente reunion importante den cuadro di Tripartiet y IPKO, unda lo discuti diferente tema cu ta toca futuro di Reino Hulandes  entre e delegacionnan di Aruba, Corsou, Sint Maarten y Hulanda.   Geschillenregeling topico principal Segun parlamentario Eduard Pieters, un di e topiconan principal ta e Geschillenregeling, un tema cu ta andando pa hopi aña caba y cu tin importancia particular pa e paisnan dentro di Reino. Durante e reunionnan lo evalua e cambionan cu a propone y e proceso constitucional cu e ley aki ta sigui actualmente. Banda di esey, tambe lo trata e topiconan manera cuido di e grandinan y lo mira posibel solucionnan na Hulanda, como esclavitud y herencia di esclavitud, un tema cu ta ta desea pa bolbe regularmente riba agenda di Tripartiet y Reino y cu lo haya atencion durante e reunionnan aki.   HOFA no ta riba agenda di IPKO Pieters a enfatisa cu contrario na loke algun hende por pensa, Rijkswet HOFA no ta un punto oficial riba agenda di e reunionnan di Tripartiet ni di IPKO. E reunionnan aki tin nan propio agenda y enfoke, cu ta principalmente riba cooperacion dentro di Reino y diferente asunto institucional, cu ta afecta e paisnan den Reino    PPA lo uza e oportunidad pa tene e reunionnan apart Aunke HOFA no ta trata oficialmente durante IPKO, PPA lo probecha su presencia na Hulanda, pa tene reunion di siguimento  apart cu diferente fraccion politico cu e PPA a conoce y cu a sostene contacto cu nan durante luna di april ultimo. Segun Pieters, den e reunionnan bilateral aki, e tema principal si lo ta Rijkswet HOFA y e reciente conseho di Raad van Advies. “Nos lo comparti e preocupacionnan cu nos tin y e argumentonan constitucional cu Raad van Advies a trece dilanti, specialmente loke ta trata articulo 38 di e ley di Reino HOFA” Pieters a declara.   Dialogo prome cu confrontacion PPA ta indica cu su meta no ta pa crea conflicto, pero pa contribui na un dialogo serio y bon informa tocante e futuro di Reino y e posicion constitucional di Aruba. “Nos kier tene e conversacionnan profundo y necesario cu respet y cu argumento. Ta precisamente p’esey nos ta sinta cu diferente partido, pa comparti informacion y tende tambe nan punto di bista,” Pieters a expresa. Pa PPA, e reunionnan na Hulanda ta representa un oportunidad importante pa hiba e combersacion profundo cu cada partido, sigui defende interes di Aruba, mientras cu na mes momento contribui na un Reino cu ta funciona mihor y cu mas respet mutuo entre tur e paisnan cu ta forma parti di dje. The post PPA TA BAY HULANDA CU ENFOKE RIBA TRIPARTIET, IPKO Y FUTURO DI REINO appeared first on Aruba Native.