Awe ta Dia Mundial di Bicicleta

Ta celebra “Dia Mundial di Bicicleta” tur aña riba dia 3 di juni. Nacionnan Uni a declara e dia aki na aña 2018 pa resalta e balor di bicicleta como un medio di transporte simpel, accesibel, duradero y bon pa salud. A inventa e prome bicicleta na 1817 y tabata conoci como e Draisienne. E aleman Karl Drais a crea un mashin di dos wiel propulsa pa e pianan di e usuario. Despues di varios adaptacion, el a bira e bicicleta cu nos conoce awe. Su trabou a marca un punto di cambio den mobilidad personal y transporte mecanisa.  Karl Drais ta conocí como e “Tata di e Bicicleta.” Uzo di bicicleta ta yuda mantene bo curpa saludabel, ta reduci contaminacion di nos medio ambiente, ta un manera economico di move di un luga pa otro y mas ainda ta contribui na menos trafico riba caminda. Rond mundo tin celebracion awe, den forma di paseo riba bais, scoge pa bay scol of trabou awe riba bais y anima famia y amigonan pa core bicicleta. Nacionnan Uni ta laga sa cu: “Bicicleta ta un solucion simpel pa hopi reto grandi den nos mundo. Bicicleta ta un di e medionan di transporte mas uza na mundo. Ta calcula cu tin mas di 1 biyon bicicleta den uzo na mundo. Den hopi pais, hende ta uza bicicleta pa bay trabou, scol, haci deporte of pa recreacion. The post Awe ta Dia Mundial di Bicicleta appeared first on 24ora - Prome Den Noticia.