Cu diferente actividad: Ta honra 61 aña cu comunidad Portugues a emigra y contribui na Aruba

Dia 10 di juni, ta conmemora e fayecimento di Luís Vaz de Camões 10 di juni 1580, cu ta considera e poeta mas grandi den lenga Portugues, autor di Os Lusíadas. E ta tambe Dia Nacional di Portugal, caminda nan ta celebra identidad, cultura y historia di pueblo Portugues. Y for di aña 1978, e ta tambe Dia di comunidadnan Portugues rond di mundo, pa honra e emigrantenan y nan contribucion. Na Aruba nos ta recordando e di 61 aña di existencia di e celebracion aki. E grupo di Portuguesnan aki den un forma hopi emocional a bini hunto p’asina gradici Aruba pa e bon aceptacion di e Portuguesnan na Aruba. Festival canto na Portugues E aña aki no por keda sin celebra! Nos ta invita tur comunidad pa participa den 3 dianan di celebracion dedica na Dia di Portugal, Luis Vaz de Camões y e Comunidadnan Portugues nan rond mundo. Diasabra, 6 di juni 2026, ta tuma luga e Festival Canto na Portugues den Club Primavera. E ta cuminsa pa 8:00 p.m. Ta habri e celebracion cu un espectacular Festival di Canto na Portugues, unda 9 participante lo mustra nan talento interpretando canticanan na idioma Portugues. E anochi lo ta acompaña pa musica biba cu Biba Lekker Band, creando un ambiente unico yen di cultura, emocion, tradicion y orguyo Portugues. E participante nan lo comparti storia, recuerdo y mantene bibo e espirito Portugues den Aruba. Un programa cultural special cu hopi sorpresa. Gastronomia Portugues Naturalmente, no por falta e delicioso culinario Portugues: ·         Bacalhau tradicional·         Espetada à Portuguesa·         Dulcenan tipico Portugues Bin disfruta di un anochi special cu famia, amigonan y comunidad, celebrando e herencia y cultura Portugues. Dia di Portugal Diaranson, 10 di juni 2026 tin e Santo Sacrificio di Misa. Esaki ta tuma luga den Misa di Nossa Senhora di Fátima, Dakota y ta cuminsa pa 7:00 p.m. Riba e dia special aki, nan kier honra y gradici tur e Portuguesnan cu a emigra pa Aruba y cu a integra den nos comunidad, contribuyendo grandemente na desaroyo di nos isla. Durante hopi aña, e comunidad Portugues a traha duro den diferente sector importante, manera: ·         Lago Oil Refinery·         Industria di construccion·         Agricultura, horticultura y hardin·         Panaderianan·         Negoshinan chikito y familiar Awor cu hopi di nan no ta mas cu nos, nos ta sigui recorda nan cu respet y gratitud. Nan esfuerso, dedicacion, sacrificio y balornan ta keda bibo den nos curason y den historia di Aruba. E comunidad Portugues semper a mantene un union fuerte rond di nan famia, nan fe catolico y tradicionnan di Madeira. Nan a crea un comunidad basa riba e balornan di trabou duro, humildad, respet y union familiar. Tambe nan a pasa nan idioma, cultura y custumbernan na generacionnan nobo. Hopi di nan yiu y nietonan a crece bilingüe, papia tanto Papiamento como Portugues, manteniendo bibo e herencia cultural Portugues na Aruba. Na e Santo Sacrificio di Misa, nos lo gradici pa tur loke e pioneronan Portugues a logra y contribui na Aruba, y nos lo honra nan memoria cu orguyo y respet. Fiesta cultural Diasabra, 13 di juni 2026 cuminsando pa 8:00 p.m. na club Primavera ta tuma luga e fiesta cultural. Un legado di forsa y tradicion Un legado di forsa y tradicion no ta solamente historia; e ta un fuente di inspiracion pa tur generacion. Durante e celebracion aki, nos ta recorda cu orguyo e dedicacion, trabou duro y perseverancia di e comunidad Portugues na Aruba. Tambe nos ta honra e tradicionnan y balornan cu nan a transmiti na nos: biba cu humildad, honestidad, respet pa famia y mantene nan cultura- y custumbernan bibo. Un anochi di musica, baile y cultura ·         Disfruta di un programa special cu:·         Participacion di Grupo Folklórico Português·         Participacion di Grupo Folklórico Infantil·         Musica biba y cancionnan na idioma Portugues·         Ambiente familiar yen di alegria y tradicion Gastronomia Portugues ·         No por falta e sabornan autentico di Portugal:·         Cuminda tipico portuguesa·         Bebidanan tradicional·         Dulcenan tipico Portugues·         Y hopi otro sorpresa culinario Invitacion general pa Aruba, comunidad Portugues y luso-Arubano Den nomber di e Directiva di Associação Social Cultural Portuguesa y di e Cônsul Honorário di Portugal na Aruba ta invita Aruba, e Comunidad Portugues y Comunidad Luso-Arubano pa uni cu nos den e gran celebracion cultural aki. Entrada ta gratis! Bin cu bo famia, bo amigonan y bo orguyo luso-Arubano. Nos ta spera boso pa un anochi inolvidabel, celebra nos cultura, nos tradicionnan y honra e rico legado cu nos antepasadonan a laga pa nos. Viva Portugal! Viva Aruba! The post Cu diferente actividad: Ta honra 61 aña cu comunidad Portugues a emigra y contribui na Aruba appeared first on 24ora - Prome Den Noticia.