Ministerio Publico no ta di acuerdo cu un parti di prome sentencia den caso Flamingo

Corte Comun di Husticia a start dialuna cu tratamento den apelacion di Flamingo, un investigacion grandi di corupcion den cual tin 3 sospechoso dilanti mesa berde: ex-minister y parlamentario Otmar Oduber. y e dos ex-ambtenaarnan Aisha Esser y Richinella Wever.E caso Flamingo ta trata di mal uzo di funcion, estafa y corupcion pasivo y a haya hopi atencion na aña 2022, despues cu a detene Otmar Oduber. Corupcion ta ora un persona uza su poder of su posicion pa beneficio personal, hopi biaha na costo di interes publico. Esaki por tuma diferente forma: for di soborno y “vriendjespolitiek” te fraude y abuso di poder. E peliger mas grandi di corupcion ta no solamente cu placa ta disparce, sino e perdida di confiansa. Ora ciudadanonan sinti cu reglanan no ta aplicabel pa tur hende, e creencia den un gobierno honesto ta cuminsa kibra, PG a bisa den corte den e sesion di Hof. Si un ministro duna tereno na prime locations na su amigonan, e amigonan aki ta ricibi trato preferencial.  Mientrastanto ciudadanonan comun y coriente di Aruba ta keda sin haya chens, aunke nan tambe tin derecho riba un pida tereno. Asina corupcion ta funciona: e ta beneficia un grupo chikito y ta pone e resto di comunidad di Aruba na desbentaha. Riba 22 di januari 2025 Corte den Prome Instancia a condena Oduber pa complicidad di estafa, intento di estafa di Pais Aruba y mal uzo di su funcion ministerial den e periodo di 2017 te 2020.El a haya un castigo di prizon igual na e cantidad di dia cu el a pasa den detencion preventivo y e maximo di 240 ora di trabao pa comunidad. Pa algun di e otro hechonan, entre nan corupcion pasivo, corte di prome instancia a declar’e liber.Tanto Ministerio Publico como e sospecho a bay den apelacion. E sospechoso Aisha Esser a wordo declara liber den Corte den Prome Instancia, y contra e decision aki Ministerio Publico a bay den apelacion.Rishinella Wever a wordo condena na castigo di prizon condicional y trabou pa comunidad di 180 ora pa complicidad di estafa, falsificacion y abuso di funcion, y el a apela e sentencia aki.Awe Ministerio Publico a pidi Corte Comun di Husticia pa condena Oduber na un castigo di prizon incondicional di 3 aña, como tambe pa sake for di e derecho di ocupa un cargo publico y di su derecho di voto pasivo pa duracion di 6 aña.Ministerio Publico a pidi ademas pa condena e sospechoso Esser na un castigo incondicional di 18 luna pa complicidad di corupcion pasivo y complicidad di abuso di funcion di ambtenaar.Contra e sospechoso Wever, Ministerio Publico a pidi Corte Comun di Husticia pa confirma e decisionnan di Hues den Prome Instancia.E tratamento den apelacion lo sigui diahuebs cu defensa di abogadonan y diabierna lo determina un fecha pa sentencia. The post Ministerio Publico no ta di acuerdo cu un parti di prome sentencia den caso Flamingo appeared first on 24ora - Prome Den Noticia.