Aruba a regresa cu bon resultado den Torneo ABC 2026 na Curaçao

Diahuebs dia 28 di mei, a biaha pa Curaçao 2 team di dam di Aruba pa competi cu Curaçao y Boneiro den un torneo anual di dam. Cada team tabata consisti di 2 hungado. Prome team di Aruba tabata Henry Knepa y Octavio Croes. Segundo team di Aruba tabata Hector Winterdal y Ricardo Wever. A biaha cu un team di hoben tambe cu tabata consisti di na prome borchi Kendrick Lue y segundo borchi Henry Lacle. E encuentro ta di team contra team. Hungadonan na borchi 1 ta enfrenta hungadonan di e otro pais na borchi 1, y e hungadonan na borchi 2, ta enfrenta hungadonan di e otro pais di borchi 2. Curaçao y Boneiro tambe a presenta cu 2 team. Asina un team di Aruba a hunga 4 wega (teamnan di e mes un pais no ta topa otro). Diabierna 2 rond tabata hunga y diasabra 2 rond. Despues di 4 rond ta conta e matchpoints di e teamnan di e mes pais hunto pa saca e ganado. Team di Boneiro-1 a score 4 punto y Boneiro-2 5 punto. Total 9 punto. Team di Curacao-1 a score 3 punto y Curacao-2 6 punto. Total 9 punto. Team di Aruba-1 a score 6 punto y Aruba-2 0 punto. Total 6 punto. Ora di empate, nos lo check e puntonan individual cu tabata gescored. Boneiro a score 20 punto individual y Curaçao 18 punto individual. Asina Boneiro a keda na prome luga den e encuentro ABC na Curaçao. Banda di e encuentro pa team, a saca tambe e hungado cu a score mas tanto punto. Esaki a bay pa Aruba su hungado Henry Knepa. Henry a score 7 punto individual (ganando 3 wega y empata 1 wega). Segundo luga a bay pa Chio Feng di Boneiro cu 6 punto. Tercer luga pa Mijail Eisden di Curaçao tambe cu 6 punto. E hobennan tambe a hunga un torneo di team. Aruba y Boneiro a biaha cu solamente un team di 2 mucha y Curaçao como pais organisado por a presenta cu 2 team. Team di Aruba a hunga contra e team di Boneiro y e 2 teamnan di Curaçao. Na final Aruba a termina na prome cu luga cu 5 matchpoints y 10 boardpoints. Segundo logra a bay pa Boneiro cu 4 matchpoints y 8 boardpoints. Den e encuentronan individual bou di e muchanan, tabata tin un empate entre Xinglong Feng di Boneiro Kendrick Lue di Aruba y Henry Lacle di Aruba. Nan tur a score 5 punto. Kendrick Lue y Xinglong Feng a hunga na borchi 1 unda e campeonnan di cada pais ta topa otro. Tabata palabra adelanta cu den caso di empate individual, ta check prome na cual borchi e hungadonan a hunga. Si nan a hunga na e mes un borchi, weganan extra cu menos tempo ta hunga. Asina Kendrick Lue a hunga wega extra contra Xinglong Feng. E prome wega a termina den un empate y e segundo wega Xinglong Feng di Boneiro a gana y asina a keda na prome luga. Kendrick Lue na segundo luga y Henry Lacle, cu a hunga na borchi 2, a keda na di tres luga. The post Aruba a regresa cu bon resultado den Torneo ABC 2026 na Curaçao appeared first on 24ora - Prome Den Noticia.