Un paso concreto pa un Aruba mas limpi: Inauguracion di Zona di Desperdicio

Zona di Desperdicio na Barcadera a wordo inaugura oficialmente dialuna dia 1 di juni, marcando un paso concreto den esfuersonan continuo di Aruba pa cu sostenibilidad, maneho responsabel di desperdicio y participacion di comunidad. E facilidad ta habri di dialuna pa diadomingo for di 7 or di mainta te cu 3 or di atardi, dunando residentenan un luga practico y accesibel pa deposita di nan desperdicio na un manera responsabel.  E Zona di Desperdicio ta resultado di un colaboracion entre Aruba Tourism Authority (A.T.A.), e Ministerio di Turismo, Transporte y Labor, hunto cu e Ministerio di Asuntonan General, Cultura, Medio Ambiente y Naturalesa y EcoTech Free Zone N.V. “Pa A.T.A., un Aruba dushi pa biba, ta un Aruba dushi pa bishita. Cada inversion cu nos ta haci ta wordo evalua for di e perspectiva aki: kico ta beneficia nos comunidad y con esaki ta fortalece nos como destinacion. Enfasis riba maneho di desperdicio no ta algo nobo pa A.T.A. y cu e Zona di Desperdicio nos ta confirma nos compromiso pa inverti den nos destinacion, proteha nos medio ambiente y fortalece un modelo turistico sostenibel cu ta beneficia tanto e comunidad como e bishitante.” Pa A.T.A. inversion den nos destinacion, su producto fisico y humano ta cardinal den e evolucion di nos turismo. Como tal for di 2014, A.T.A. a eleva su enfoke riba “Destination Development” y ta sostene entre otro nos naturalesa, cultura, siguridad, nos playanan, educacion, barionan, innovacion, entrepreneurship, combatimento di problematica di pushi y cacho riba caya, proyectonan infrastructural y hopi mas. Tur ta contribui na bienestar di nos pais y nan e experiencia pa nos huespednan.  Campaña Aruba Limpi Aruba Limpi a evoluciona di un campaña tradicional di conscientisacion pa uno awo enfoca riba cambio di comportacion. Mas aya di crea consciencia, Aruba Limpi awo ta duna residentenan hermentnan practico y acceso real pa maneha desperdicio corectamente pa medio di e Zona di Desperdicio. Asina ta yuda reduci dump ilegal y ta yuda mehora limpiesa den barionan y espacio publico.  Pa medio di e campaña ‘Aruba Limpi’, e comunicacion lo sigui enfoca riba educacion y conscientisacion, cu enfasis riba responsabilidad comparti y e impacto positivo cu un medio ambiente limpi tin riba nos calidad di bida y riba e imagen di Aruba como un destinacion limpi, atractivo y sostenibel. Den dianan cu ta bini, residente nan por spera videonan informativo cu ta duna mas claridad tocante e uzo corecto di e Zona di Desperdicio, e categorianan di desperdicio permiti, ki tipo di desperdicio no ta permiti, y pakico separacion di desperdicio ta esencial. Tur informacion detaya tocante Zona di Desperdicio ta disponibel riba e website oficial di Aruba Limpi, www.arubalimpi.com. Sigui Aruba Limpi riba su pagina di social media @arubalimpi pa tur actualisacion.  The post Un paso concreto pa un Aruba mas limpi: Inauguracion di Zona di Desperdicio appeared first on 24ora - Prome Den Noticia.