Minister Gerlien Croes: Dialogo cu veld di educacion pa fortalece rumbo pa enseñansa multilingual na Aruba

Despues di tres dia di sesion intensivo cu representantenan di e veld di educacion, Minister di Educacion, mr. Gerlien Croes, ta confirma cu e proceso di consulta a resulta den un paso importante pa fortalece y sigui desaroya enseñansa multilingual na Aruba. E sesionnan, cu a tuma luga riba 26, 27 y 28 di mei, a reuni maestronan di scol basico, specificamente di klas 1, 2 y 3, pa comparti nan experencia, sugerencianan y punto di bista riba e adaptacion y ampliacion di curiculo, material educativo y profesionalisacion di maestro. E dialogo habri y constructivo cu a tuma luga durante e tres dianan a confirma e importancia di continua na inverti den sosten pa maestro y desaroyo di un sistema educativo cu ta refleha e realidad multilingual di Aruba. E aportacionnan ricibi lo forma un base solido pa implementacion di accionnan concreto riba tereno di curiculo y capacitacion. Minister Gerlien Croes a expresa su gradicimento na tur participante pa nan compromiso, sosten y contribucion activo durante e sesionnan: “Mi ta gradici e comision di IPA cu a haci e ‘quick scan’, tur maestro/a, directivanan di scol y profesionalnan cu a participa activamente. Boso input ta esencial pa forma un sistema educativo cu ta responde na necesidadnan real di nos muchanan y di nos pais”. Ministerio di educacion ta reafirma su compromiso pa sigui traha man den man cu e veld di educacion pa fortalece y empodera sector educativo, cu enfoke riba progreso continuo y desaroyo integral di nos alumnonan—kende ta e base di futuro di Aruba. Ademas, lo sigui inverti den desaroyo di material educativo moderno y relevante, aliniando cu e meta di crea un ambiente di siñamento inclusivo unda idioma materno, Hulandes, Ingles y Spaño tur tin nan luga den desaroyo academico di e alumno. Minister Gerlien Croes ta gradici tur esnan den e veld di educacion cu a base di nan propio iniciativa ta inverti den contribui na e desaroyo y creacion di materialnan pa nos alumnonan. E proceso aki ta marca un paso significativo pa un enseñansa mas fuerte, inclusivo y prepara pa futuro, unda colaboracion y participacion di tur actor ta central. Hunto, nos ta sigui construi un sistema educativo cu ta empodera nos alumnonan pa pensa, comunica y logra den un mundo cada bes mas global. The post Minister Gerlien Croes: Dialogo cu veld di educacion pa fortalece rumbo pa enseñansa multilingual na Aruba appeared first on 24ora - Prome Den Noticia.