Fraccion di AVP ta apoya propuesta concreto pa atende crisis di cas y subida di huur

Fraccion di AVP ta considera e crisis actual di vivienda como un di e retonan social y economico mas urgente cu Aruba ta enfrenta den actualidad. E escasez di cas pagabel y e subida continuo di huur ta afecta cada bes mas famia Arubano, hobennan cu ta busca nan prome hogar, profesionalnan local y ciudadanonan cu entrada abou y medio. Segun Fraccion di AVP, e situacion actual ta exigi accion decisivo y solucionnan practico cu por brinda resultado tangibel pa pueblo di Aruba. P’esey, AVP-Futuro a inclui un serie di propuesta concreto den su programa di gobernacion, enfoca pa aumenta disponibilidad di vivienda, fortalece sosten pa famianan cu tin dificultad pa paga huur y crea mas oportunidad pa ciudadano por bira doño di nan propio cas. Un di e propuestanan principal ta e evaluacion y posibel ampliacion di huurtoeslag of huursubsidie. E medida aki lo permiti cu famianan cu entrada limita haya un contribucion mensual pa cubri gasto di huur, reduciendo e presion financiero cu hopi hogar actualmente ta experimenta. Ademas, AVP-Futuro ta enfoca na aumenta e cantidad di cas pagabel y vivienda social disponibel na Aruba. Pa logra esaki, cooperacion entre gobierno, FCCA, desaroyadonan priva y otro actor relevante lo ta fundamental. E obhetivo ta crea mas oportunidad pa e grupo di residentenan cu aworaki no ta logra drenta mercado di vivienda. Un ehempel concreto di e vision aki ta e proyecto Burubundu Residences na Pos Chikito/Burubundu. E plan ta contempla entre 850 y 1.000 unidad residencial, incluyendo cas, apartamento y flat moderno, integra cu area berde, facilidadnan recreativo, espacio deportivo y facilidadnan comunitario. E proyecto ta representa un inversion importante den futuro di Aruba y un oportunidad pa crea un comunidad moderno, accesibel y sostenibel pa famianan local. “Nos no por sigui wak con e soño di tin un cas propio ta bira cada bes mas inalcansabel pa hopi Arubiano. Mester tin un maneho integral cu no solamente ta atende e necesidadnan di awe, pero cu ta prepara Aruba pa e demanda di vivienda di mañan,” Fraccion di AVP ta expresa. Den mesun contexto, AVP-Futuro ta propone pa fortalece e Fondo Nacional di Garantia door di aumenta e garantia disponibel pa hipoteca. E medida aki lo permiti cu mas persona por reuni e condicionnan necesario pa obtene financiamento y logra cumpra nan propio hogar. Fraccion di AVP ta reconoce tambe cu e crecemento di vacation rentals, manera Airbnb, a crea oportunidadnan economico importante pa Aruba. Sin embargo, e impacto riba disponibilidad di vivienda local no por wordo ignora. P’esey, AVP ta aboga pa un regulacion balansa cu proteha e interes di turismo mientras cu tambe percura cu residentenan local por sigui tin acceso na vivienda pagabel. Otro area cu mester atencion inmediato ta e evaluacion di terenonan cu a haya opcion pa desaroyo, pero cu ainda no a wordo construi. Segun AVP, mester revisa con e proyectonan ey por wordo activa y acelera pa aumenta e oferta di vivienda den un plazo razonabel. Banda di esey, revitalisacion urbano di Oranjestad y San Nicolas ta forma parti di e vision amplio pa vivienda. E areanan aki ta presenta oportunidadnan importante pa crea vivienda pa hoben profesional, studiante y famianan cu ta busca opcionnan cerca di centro urbano y actividad economico. Fraccion di AVP ta compronde cu tin preocupacionnan den comunidad tocante financiamiento pa vivienda social y e rol di FCCA. Precisamente p’esey AVP ta enfatisa cu tur decision mester ta tuma cu transparencia, responsabilidad y supervision adecuado. Sin embargo, segun e fraccion, e magnitud di e crisis actual ta exigi accion concreto y no solamente discusion. “Aruba mester construi mas, facilita mas y proteha mas. E tema di vivienda ta toca directamente calidad di bida, stabilidad familiar y oportunidad economico. Nos ta comprometi pa sigui impulsa solucionnan realista cu pone e necesidadnan di pueblo prome,” asina e fraccion di AVP ta conclui. Pa AVP-Futuro, e prioridad ta cla: mas cas pagabel, mas sosten pa huur, mas oportunidad pa compra cas propio, regulacion balansa di vacation rentals y e realizacion di proyecto concreto cu por amplia significativamente e oferta di vivienda pa famianan Arubano. The post Fraccion di AVP ta apoya propuesta concreto pa atende crisis di cas y subida di huur appeared first on 24ora - Prome Den Noticia.