Caribbean Arthritis Foundation cu un otro charla interesante pa su pashentnan

Recientemente Caribbean Arthritis Foundation a organisa un otro charla pa pashent nan atritico cu tres presentacion sumamente interesante. E biaha aki e charla a tuma luga na Theresita Center, San Nicolas den un sala completamente yen.  E anochi a cuminsa cu un presentacion general pa miembro di directiva fundado Ebby Schwengle sigui pa e prome charla presenta pa dr. Patrick Haime riba e topico “The Mechanics of Mobility” sigui pa informacion valioso pa pashentnan cu ta sufri di artrosis. Despues a sigui cu un charla presenta pa fisioterpista Jerome van der Spil, cu e topico “The importance of exercise for patience with arthritis”. Durante di su presentacion e la laga tur pashent activamente participa den actividad fisico dunando informacion valioso. Por ultimo dr. Ike Posner a duna un presentacion interesante riba e topico “Pain Mechanism in Arthritis”, cu por cierto a drenta den e directiva di Caribbean Arthritis Foundation como secretario, reemplasando Ebby Schwengle, cu a sirbi den e funcion aki pa 11 aña.  Durante di cada presentacion varios pregunta a wordo contesta pa e oradornan, asina aportando na un pashent miho informa. Caribbean Arthritis Foundation su enfoca ta pa continuamente conscientisa e veld di cuido riba diagnostico na tempo y alabes pashentnan bon informa, pa asina mehora e calidad di bida di tur pashent atritico aki na Aruba. Caribbean Arthritis Foundation tin dos lema cu ta “Improving lives” y “A commitment to healing”. Banda di esaki  Caribbean Arthritis Foundation ta sostene e obhetivo pa un desaroyo sostenibel di Nacion Uni, es ta: (3) salud y bienestar, (10) reduce desigualdad (17) aliansanan pa logra metanan. Un danki special ta bay pa Nationale Vereniging Reumazorg Nederland, patronicado di Caribbean Arthritis Foundation y tur orador. The post Caribbean Arthritis Foundation cu un otro charla interesante pa su pashentnan appeared first on 24ora - Prome Den Noticia.