Na Cabo Verde: Ramon Todd Dandaré a atende conferencia “Encontro Internacional da Crioulidade Atlântica” 

Linguista Todd Dandaré a destaca rikesa cultural y linguistico di Caribe. Durante e dianan 26,  27, 28 y 29 di mei, e linguista y Papiamentista Riohachero Arubiano, Ramon Todd Dandaré a participa y atende,  pa medio di un invitacion formula door di Presidencia di Cabo Verde, un conferencia: “Encontro Internacional da Crioulidade Atlântica” na Praia, ciudad capital di e pais Africano aki. Un conferencia cu a conta cu presencia di Presidente di e Republica di Cabo Verde y otro personahenan importante di e sector politico, enseñansa, cultura y arte di multiple teritorio continental y insular di mundo. Todd Dandaré a trece su disertacion den cuadro di un panel di experto na Universidad de Cabo Verde, unda el a representa tanto Aruba como La Guajira. E tabata un escenario ideal di debate academico, unda e linguista a destaca y duna prioridad n’e rikesa tanto cultural como linguistico di e gran Caribe, unda ta existi un variedad di lenga Amerindia y creole. E lenganan cu ta merece di ta cuida, papia, conserva y protegi na fabor di e desaroyo di e pueblonan. Pero tambe el a haci un apelacion pa rescata e tradicion oral, y defende e memoria colectivo. Ta asina cu e ciudad di Praia a bira un espacio ideal y interesante pa bin cu un debate internacional relaciona cu e tematica di e diaspora, diversidad cultural, educacion y identidad, unda e linguista Todd Dandaré a probecha pa introduci e Revista SER Caribe, ya cu e ta miembro honorario di e Conseho Editorial di e media aki. Dia 2 di mei ultimo en conexion cu Dia di Guajiridad, Todd Dandaré a recibi un homenahe durante e asina yama: Encuentro Caribense Colombo Neerlandes “Mma Pe´ipaasü” (E tera cu ta uni nos) cu a tuma luga na Riohacha, La Guajira, unda ta conmemora tambe 200 aña di relacion diplomatico entre Reino Hulandes y Colombia. The post Na Cabo Verde: Ramon Todd Dandaré a atende conferencia “Encontro Internacional da Crioulidade Atlântica”  appeared first on 24ora - Prome Den Noticia.